Myen hpyen hpung ni Pat ( ပယင္း ) htu ai mungshawa ni hpe rim woi mat
KIA Dap Ba ( 2 ) ginra, Htang Bra Pat Maw kaw shamu shamawt du nga ai Myen hpyen hpung ni gaw Pat htu sha ai mungmasha nkau hpe December shata 4 ya shani Munghkawm mare maga de rim woi mat ai lam na chye lu ai.
Rim hkrum ai masha marai kade re gaw n chye ai, Pat htu sha ai mungshawa ni kaw gumhpraw wa hpyi yang, gumhpraw nlu jaw ai mungmasha ni hpe rim woi mat ai sha n-ga yup len ginsum ni hpe mung, wan nat jahten kau ya ai lam, buga masha ni kawn chye lu ai.
Htang Bra Pat Maw hta Jinghpaw hte Rakhaine ni hpe gaw n shang shangun ai. Dai kaw galaw sha ai ni gaw Myen, Sam hte Lisu Pyi-Tu-Tsit ni re. Myen hpyen hpung ni du jang Pat nhkun langai hta Kyats 500,000 ( Sen Manga ) hta sha ai re lam chye lu ai.
Danai lam Ting Kawk mare kaw shara jahkrat nga ai Hk.L.Y 298 dap na Captain Ze Yar Thing woi awn hpyen hpung ni mung, December 4 ya shani hta lai wa lai sa mungshawa ni a modo ni hpe sawk jep nga ai lam, Ting Kawk mare masha ni tsun ai kawn chye lu ai.
