TNLA, MNDAA pawng hpawm hpyen hpung ni hte Myen hpyen hpung ni gasat gala majan byin
Mungmyit Sinli Ga ( Kachin Sub-state ) KIA Dap Ba 6 Dap Dung 9 ginra, Sha-u Bum hte Hukan Bum shara lahkawng kaw December shata 6 ya daihpawt hkying 7:00am aten kaw na TNLA, MNDAA pawng hpawm hpyen hpung ni hte Myen Dapnu 11 kata na hpyen hpung ni laja lana gasat gala majan byin nga ai lam, shawng lam na Salang langai shana wa ai.
Myen hpyen dap ni gaw hpyen n-gun 200 jan hte hpyen man 3 hku nna TNLA hte MNDAA pawng hpawm hpyen hpung ni shara la nga ai Sha-u Bum hte Hukan Bum maga htu lung wa ai majaw, gasat gala majan byin ai re lam, Salang wa tsun dan ai.
Gasat gala majan byin nga ai shara de, Daknai mare kaw dung ai Myen hpyen dap ni mung, sinat kaba hte gap bun nga ai lam, Kuthkai maga de na hpyen n-gun 80 daram mung htu lung wa ai lam, Salang wa matut tsun dan ai kawn chye lu ai.
December shata 4, bat hpang 2 ya shani hta mung, KIA Dap Ba 3 Dap Dung 1 ginra, Man Maw Muklum kaw, lawu ga na hpyen manam ni modo 11 hta hpyenla hpring hpring jawn nna du shatup nga ai lam, buga masha ni kawn chye lu ai.
