Apnawng saranum yan a myitdum kyu hpyi hpawng galaw
Apnawng saranum Tangbau Hkawn Nan Tsin hte Saraanum Maran Lu Ra yan a (4) ning hpring myit dum akyu hpyi hpawng hpe Mungmau Ginwang, Kawnghka mare, Namtau Buga hta daini hkying 11:00 am hta galaw ai lam na chye lu ai.
Ndai saranum yan gaw laiwa sai 2015, January 19 ya shana hta Myen hpyen ni Roi rip Zingri sat kau hkrum ai re.Dai ten hta shanyan na moi mang hpe Myitkyina myu de htaw wa nna Christan lupwa jawbum hta atsawm sha makoi mayang sai re.
Saranum yan a laning myi hpyring myitdum akyu hpyi hpawng hpe Yangon myu kaw galaw lai wa sai re.Dai galaw ai shaloi shiga dap ni hte laga maigan mungdan na shiga dap yawng hpe shaga nna shi sanglang hpawng galaw sai.(2) ning hpring myitdum kyu hpyi hpawng hpe gaw kawnghka mare kaw galaw sai.(3) ning hpring myitdum kyu hpyi hpawng hpe gaw Myitkyina Nawngnang Jawbum kaw masat shadaw jun let galaw la sai re.(4) lang ngu na myit dum kyu hpyi hpawng hpe gaw kawnghka mare hta galaw ai lam na chye lu ai.
“Bai du na 2020, 5 ning ngu na ladu hkrum myit dum kyu hpyi hpawng hpe gaw Jawbum kaw masat shadaw hpe magri pa shakap let galaw na,wunpawng sha ni a labau hta ntara ai hku galaw lai mat wa sai mabyin masa hpe gaw galoi nmalap ga, myitdum su hprang nga ga.Zimsha nga yang anhte hka kap na re.Dai ni na mali ning hpring kyuhpyi hpawng hpe mung yawng ngun jaw ga, nawku hpung shagu kawna ni mung kyu hpyi garum ya na matu” KBC Ginjaw, Ningbaw Rev.Dr Hkalam Samson tsun ai.
Dai ni na kawnghka kaw galaw ai sara num yan a myitdum kyu hpawng hta KBC Ningbaw Rev.Dr Hkalam Samson hku nna “Hkum hkrit” ngu ai ga baw hte mungga jaw ai hte KBC Ginjaw rung magam gun ni, mungmau ginwang magam gun ni Sara num yan a nta masha ni, ni nawn ai buga hpung masha ni yawng marai hkying mi jan sa du shang lawm ai lam na chye lu ai.
