KIA ni nga ai ginra hta myen hpyen dap ni hpyendap nnan jung jat
Mungmyit Sinli Ga ( Kachin sub-state ) KIA Dap Ba 6 Dap Dung 9 hte Dap Dung 36 ginra ni hta Myen hpyen dap ni hpyen dap nnan ni hpe jung jat wa nga ai lam na chye lu ai.
Hpyen dap nnan jung jat ai shara ni gaw, Man Yen mare lahta Hpara Kawng, Ja Chyai Yang lawu Man Bang Kawng, Hu Hpyet Mai Bat bum, Kawng Wai mare baw Lung Hpum Hkyet hte Shwe Zin Wan bum ni hta re. Ndai shara ni hta shawoi gaw hpyen dap jung ai lam nnga ga ai nga nna shawng lam na salang langai shana wa ai.
Myen hpyen dap kawn lai wa sai 2018 ning December shata 21 ya shani hta Sam Mung hte Jinghpaw Mung na ginwang ginjaw shara 5 hta shata 4 hpyen shamu shamawt lam hpe gan jahkring da na hte simsa lam hpe ngam nga ai laknak lang wuhpung langai hkrai hte hkrum bawng ban na matu ndau shabra laika shapraw da ai re.
Ya na zawn ndau shabra laika shapraw da ai raitim, Myen hpyen dap gaw, lai wa sai 2018 ning December shata 12 ya shani kaw nna 2019 ning January shata 10 ya laman hpyen dap shara 5 hpe jung jat wa ai re, nga nna salang wa matut tsun dan ai.
