59 lang na Rawt Malan Masat Ninghtoi hpawng hte magam gun ladaw 50, 40, 30, 20, 10 ning hpring ai ni hpe shagrau sha-a hpawng galaw
Laiza Muklum Padang Hkrunlam Majan Masing Woi Awn Rung hta 59 lang na rawt malan masat ninghtoi hpawng hte magam gun ladaw 50, 40, 30, 20, 10 ning hpring shagrau sha-a hpawng hpe February shata 5 ya jahpawt hkying10:00am kawn shani ka-ang hkying 12:03pm aten du hkra angwi apyaw hte galaw la lu ai lam chye lu ai.
Zuphpawmg lamang hpe Sara Kaba Lasang Tu San kaw nna akyu hpyi ap ya ai, dai hpang Wunpawng Amyusha Dawnghkawn hte Mungdan hte Mungdan sha ni a matu asak apnawng mat wa sai Share Shagan ni hpe baw gum hkungga jaw ai lam galaw ai.
Wunpawng Mungdan Shanglawt Hpung Ginjaw Komiti Tingnyang Up,Wunpawng Mungdan Shanglawt Kongsi Ningbaw Kaba Du Daju Jum Nban La kaw nna 59 lang na rawt malan masat ninghtoi mungga jaw ai hte rawt malan mungga hta lakap nna lachyum ni hpe tsun sanglang dan ai lam galaw ai.
Shawnglam Amyusha Rawt Malan Hkrunlam a matu hte magam gun ladaw 50, 40,30,20,10 ning hpring magam gun ni a matu, Rev. Lahpai Shing Rip kaw nna akyu hpyi ya ai, dai hpang magam gun ladaw 50 ning hpring ai hpe gaw Ja dakhkama hte lakmat jaw ai, ngam ai ni hpe gaw shagrau sha-a lakmat jaw ai re.
Magam gun ladaw 50 ning hpring marai 1, 40 ning hpring marai 10, 30 ning hpring marai 27, 20 ning hpring marai 37, 10 ning hpring marai 108 yawng marai 183 tup re lam chye lu ai.
ULA/AA Rakhaing amyusha jinghku rawt malan hpung ni kaw nna mung, shagun laika hte hti ndau dan ai lam galaw ai.
59 lang na mungshawa shanglawt rawt malan ninghtoi hpawng hta du sa ai mungchying kanu kawa ramma ni, Magam Dap, Makan Dap shagu na magam gun ni hte jinghku rawt malan rai nga ai ULA/AA, ABSDF Jawngma Dap na magam gun ni yawng marai 1928 tup re lam chye lu ai.
Wunpawng Mungdan Shanglawt Hpyen Dap KIA hpe lai wa sai 1961 ning February shata 5 ya shani hpaw hpang dat ai gaw 2019 ning hta 58 ning hpring 59 lang ngu na masat ninghtoi mung rai nga ai. Ndai Shanglawt Rawt Malan masat ninghtoi hpawng lamang hpe Mungdan kata, Mungdan shinggan kaw du nga ai Wunpawng Amyusha ni galaw nga ai re lam chye lu ai.
