Mali, Nmai hka madim hpe ning hkap shawa n gun madun woi galaw ai Jan Nhkum Ja Hkawn hpe Myen Balik dap ni tara jawat

Mali, Nmai hka madim galaw ai lam tsep kawp dawm jahkring kau na matu, February shata 7 ya shani lam hkawm shawa n gun madun woi awn galaw ai Jan Nhkum Ja Hkawn hpe Myen Balik Du Myint Moe kawn Nyein Su zi pukma 20 hte tara jawat da ai re lam na chye lu ai.

Mana de Balik dap de shaga ai majaw mungshawa ni hte Tara kasa ni rau sa ai ngai hpe san jep ma ai, akyu hpyi hpawng lamang galaw ai hpe ahkang nhpyi ai, nsen htawn jak ( loudspeaker ) hkum lang ngu ai hpe lang ai, No Myitson Dam nga ai laika si ni lang ai dai majaw Nyein Su Zi pukma 20 hte tara jawat da ai re. Ngai gaw mungshawa ni a pahkam hte bai wa ai, nga nna  Saranum Ja Hkawng tsun ai.

Du wa na February shata 11, bat hpang 1 ya shani hta gaw Tara rung dung na re lam chye lu ai.