MNDAA Kokang hpyen hpung hte Myen hpyen hpung ni gasat gala majan byin
Mungmyit Sinli Ga ( Kachin Sub-state ) KIA Dap Ba 10 Dap Dung 17 ginra, Gangming Loi Dau Ginwang, Man Mak sinpraw maga Banggaw bum sa ra kaw February shata 9 ya jahpawt hkying 7:30am aten kawn hkying 10:30am aten du hkra MNDAA hpyen hpung hte Myen hpyen dap Dapnu 99 kata na hpyen n gun 200 daram hte laja lana gasat gala majan mabyin ai lam chye lu ai.
Myen hpyen hpung ni Man Mak maga de na lung wa ai hpe MNDAA hpyen hpung ni gaw mungshawa ni hpe Banggaw bum de MNDAA hpyen hpung ni nga ai, nanhte hte gap hkat jahkring da ai ngu nna sa tsun shangun ai raitim Myen hpyen hpung ni shanang lung wa ai majaw gap hkat ai re, nga nna shawng lam na salang langai shana wa ai.
Laja lana gap hkat ai gaw hkying hkum 2 daram re. Dai hpang sinat kaba hte bai gap bun hkat ai lam nga ai. Gap hkat ai shara hpe MNDAA hpyen hpung ni gan yen da ya ai re lam chye lu ai.
Laiwa sai 2018 ning December 21 ya shani hta Sam Mung hte Jinghpaw Mung na Ginwang Ginjaw shara 5 hta shata 4 hpyen shamu shamawt lam hpe jahkring da na hte simsa lam hpe ngam nga ai lak nak wuhpung langai hkrai hte hkrum bawng ban na matu Myen hpyen dap kawn n dau shabra laika shapraw da ai re.
