Sen hkying lam manu nga ai Lungseng tawng jung ai hpaw hpawng galaw
Myitkyina Muklum, Sama lam hte Sumpra bum lam mazup kaw February shata 12 ya shani hta Doctor Sut Du Bum Yun hkan nu wa ni alu jaw ai sen hkying lam manu nga ai Lungseng tawng jung ai hpaw hpawng lamang galaw ai lam chye lu ai.
Lungseng alu jaw ai Dr. Sut Du Bum Yun kaw nna yaw shada ai lam hpe ya na zawn tsun ai.
“Dai ni anhte Jinghpaw Mungdan gaw Lungseng pru ai Mungdan rai nga ai, Mungkan kaw manu dan la ai Lungseng anhte kaw she pru ai dai majaw Jinghpaw Mung Myu Taw Myitkyina kaw da nan da ra ai anhte she madu re ngu ai hpe Mungkan kaw na chye hkra ndai zawn re galaw nan galaw ra ai ngu ai hpe yaw shada nna jung ai re”
Ya matut nna Sagaing ginwang, Jinghpaw Mung a lamu ga jarit Namsi Aung, Myitkyina wanleng daru hte Hpakant numshang kaw mung jung na re lam, Dr. Sut Du wa tsun ai.
Lungseng shadaw jung ai hpaw poi hta Jinghpaw Mung Hkringmang Daju Dr. Hkyet Awng hte Magam dap shagu na magam gun ni sa du shang lawm ai lam chye lu ai.
Lai wa sai January shata hta mung, Dr. Sut Du Bum Yun hkan nu wa ni hku nna sen hkying lam manu nga ai Lungseng alu jaw ai hte Myitkyina nbungli daru shang wa ai shara kaw masat masa galaw da sai re.
