Sara Zau Jat, Sara Lum Zawng hte Saranum Nang Pu ni hpe Human Right Award shagrau sha a hpawng galaw
Majan kata chyat rawng nga ai hpyen yen mungshawa ni hpe shalawt la na matu, Myitkyina Muklum kaw lai wa sai aten hta lam hkawm shawa n-gun madun woi ai majaw, htawng dam shata 6 hte gumhpraw dam Sen Manga hpra tara jeyang hkrum ai Sara Zau Jat, Sara Lum Zawng hte Saranum Nang Pu ni hpe February shata 13 ya jahpawt hkying 10:00am aten hta Human Right Award shagrau sha a hpawng galaw ai lam chye lu ai.
Shagrau sha a hpawng lamang hpe Myitkyina Muklum, Manau Wang Majoi Gawknu kaw galaw ai re. Ndai lamang hpe Wunpawng Mungbawng Rapdaw ( WMR ) hte World Kachin Congress ( WKC ) ni woi awn nna Human Right Award lakmat hte gumhpraw Kyats 12,000,000 ( Seng Latsa Hkun ) hpe shagrau jaw ai.
Ndai shagrau lakmat jaw ai hte seng nna komiti malawm rai nga ai Sara Steven Naw Awng kaw nna ya na zawn tsun ai.
“Tengman ai lam hta gwigwi tsap na matu, mungchying shawa hte ya bai kaba wa ai ramma ni, Generation ningnan ni kaw na hkawt nhkrit na matu, hpyen majan a majaw chyat shingdang da ai hpe lawt nna hkye hkrang la ai magam bungli hte tengman rap ra lam hpe shapraw ai magam bungli, maga mi hku nna Myen hpyen dap ni tara jawat ahkyak la ai majaw, htawng dam shata 6 hte gumhpraw dam Sen Manga hpra galaw ai ngu gaw manu mana sawng ai ga re. Dai zawn re hkrum sha ai ni hpe yawng a gawng malai hku nna atsam ningja jaw ai re ngu yaw shada let galaw ai re”
Anhte Kachin ni kadai hpa baw galaw ai mi raitim, shada n-ging hka hkat na ahkyak ai, tinang ningbaw tinang wuhpung galaw yang chyu sha bungli kaja ngu ai myit ni nrawng hkra kadai wa mi raitim, Wunpawng Amyusha nnga Myen Mungdan galai shai wa na matu jaw ai lam de sa ga, nga nna matut tsun ai.
Sara Zau Jat, Sara Lum Zawng hte Saranum Nang Pu ni hpe World Kachin Congress kaw nna “MUSHE” ngu ai ninglaw ga hte shagrau sha a lamang galaw ai rai nna, dai hpawng hta WMR, PCG, MCC, makam masham Sara ni hte hpyen yen kaw na kanu kawa ni yawng marai hkying mi jan du sa ai lam chye lu ai.
Ndai Sara/num marai 3 gaw Myen hpyen dap a sari hpe jahpoi ai ngu pukma 500 hte tara jawat hkrum nna 2018 ning December shata 7 ya shani hta Myitkyina tara rung kawn htawng dam shata 6 hte gumhpraw dam Sen Manga hpra tara jeyang hkrum ai re.
