MNDAA Kokang hpyen hpung ni hte Myen hpyen hpung ni gasat gala majan byin

Mung Myit Sinli Ga ( Kachin Sub-state ) KIA Dap Ba 6 Dap Dung 36 ginra hta shamu shamawt nga ai Myen hpyen dap  Dapnu 99 kata na  hpyen hpung ni hte MNDAA Kokang hpyen hpung ni February shata 24 ya shani ka-ang hkying 12:00pm aten daram hta gasat gala majan byin ai lam chye lu ai.

“Gasat gala majan byin ai lam gaw Kokang MNDAA hpyen hpung ni Lisu hpakawn kaw nna Zauya maga de rai wa ai shaloi Myen hpyen hpung ni nga taw ai kaw ang katut, munite 5 daram gap hkat nna Kokang MNDAA hpyen hpung ni hpang lam de bai hting nut mat wa ai re” nga nna Shawng lam na lit nga ai Salang langai tsun dan ai.

KIA Dap Ba 6 ginra ni hta mung, Myen Dapnu 99 kata na hpyen hpung ni hpyen n gun 300 daram shamu shamawt taw nga ai sha n-ga February shata 20 ya shani hta mung, Bumpri Bum Ginwang Daw, Walai Bazung mare makau kaw KIA Dap Dung 9 Kung 2 hpyen hpung ni hte Myen Dapnu 99 kata na hpyen hpung ni gasat gala majan byin ai re.