12th lang na Hkahku Ginwang ( HGZ ) Ramma sharin hpawng kaba galaw na hkyen
12th lang na Hkahku Ginwang ( HGZ ) Ramma sharin hpawng kaba hpe HGZ kawn woiawn galaw nhtawm Hka Hku Ginwang Janhkawng Buga Hkalup Hpung Mali Bunrun mare hta du wa na April shata praw 9 ya kaw nna 13 ya shani du hkra galaw sa wa na re lam chye lu ai.
Ndai sharin hpawng hta sharin mat na ginlam ni gaw Ramma hte Hpaji ( Sara Latau Zau Lat ), Ramma hte hkuhkau kanawn mazum lam ( Sara Bau La Doi ), Daini na prat hte Daini na ramma ( Saranum Lahpai Seng Maw ), Ramma hte myu sha lam ( Sara Jaufa Hkun ), KBC ramma langai a tsap shara ( Sara Jang Maw Nan Hpung ) ni kaw nna lakjet jaw na rai nna KBC a hpung woi sara ni mung sa du shang lawm na re lam chye lu ai.
Ndai Sharin hpawng hta “ Ramma Arawng Sadang ” ngu ai ga baw hte kahkrang shingjawng lamang ni, Uma shagan Cup gawdin shingjawng lamang ni mung nga na re lam chye lu ai.
Yungwi ninghkring Ah Ba Di, Aurali hte Ah Gyung ni kaw nna mung mahkawn sharin ya ai lam ni hpe galaw sa wa na re. Ndai sharin hpawng hpe mali ning hta kalang galaw sa mat wa na re lam chye lu ai.
