TNLA, SSPP pawnghpawm hpyen hpung ni hte RCSS hpyen hpung ni numdaw 3 lang gasat gala majan byin
Namdu Muklum makau na Manli mare makau kaw TNLA, SSPP pawnghpawm hpyen hpung ni hte RCSS hpyen hpung ni March shata praw 2 ya shani numdaw 3 lang gasat gala majan byin ai lam, TNLA shiga lawk kawn chye lu ai.
Jahpawt hkying 4:00am aten kawn hkying 10:00am hta kalang hkying 10:00am kawn hkying 12:30pm hta kalang hkying 1:00pm kawn 7:00pm hta kalang gap hkat ai re. RCSS hpyen hpung ni gaw Chawng Sa mare maga de na hpyen n gun hte htu shadut lung wa ai majaw gasat gala majan byin ai re. Gasat gala majan hta RCSS maga na laknak arung arai nkau hpe zing la lu ai lam chye lu ai.
March shata praw 1 ya shani hta mung, TNLA, SSPP pawnghpawm hpyen hpung ni hte RCSS hpyen hpung ni Manli mare makau kaw gasat gala majan byin ai hta RCSS maga na marai 1 asak si sum mat ai lam chye lu ai.
