KIA hte Myen hpyen hpung ni gasat gala majan matut byin

Mungmyit Sinla Ga ( Kachin Sub-state ) KIA Dap Ba 4 Dap Dung 8 ginra hta shamu shamawt nga ai Myen hpyen hpung n gun 100 jan hte KIA Dap Dung 8 Kung 1 hpyen hpung ni March shata 11 ya jahpawt hkying 7:50am aten kawn gasat gala majan matut byin ai lam chye lu ai.

Gasat gala majan byin ai hte seng nna, Namhpakka ginwang, Ga Leng ginwang daw na lit nga ai Salang langai ya na zawn tsun ai.

“Ya hte byin ai makau kaw sha re. Kung 1 ginra, Nawng Pa hte Nawng Hoi lapran kaw bai ngoi taw nga sai. Myen dap ni gaw Dapnu 99, Hk.L.Y 45, Hk.L.Y 241 hte ginra madu rai nga ai Kawnghka Pyi Tu Tsit ni mung lawm rai nna anhte ni nga ai shara de htu lung wa ai majaw, kaning ndi na hkap shingla ra ai”

March shata 6 ya shani hta mung, KIA Dap Dung 8 ginra, Namsum bum kaw ndai hpyen dap ni hte sha KIA hpyen hpung ni gasat gala majan byin ai re.