5th lang ngu na jarit mayan hpyen yen Ramma sharin hpawng galaw na
5th lang ngu na jarit mayan hpyen yen ramma sharin hpawng hpe Ginjaw ginra Dabang ginjaw Jarit mayan hpyen yen ramma woi awn komiti kawn woi awn nna Alen Bum Lahta tsang jawng kaw April shata 8 ya shani kawn April shata 13 ya shani manam hkra na re lam na chye lu ai.
Sharin hpawng lamang hte seng nna Rev. Dingsi Tu San Awng ya na zawn tsun ai. “ Sharin ya na Sara/num ni gaw Htunghkring, ginru ginsa labau hte seng ai hpe gaw Htung hkring Sarakaba Marip Bawk San, Hpaji hte seng ai hpe gaw Du Kaba Sumlut Gun Maw, Ramma hte mung masa hte seng ai hpe gaw Ninggawn Amu Madu Salang Kaba Kumhtat Hting Nan, Tara Upadi hte seng ai hpe gaw Tara kasa Lahpai Hkun Nawng, Simsa lam hte Seng ai hpe gaw Salangkaba Maran Jaw Gun, laksan hku nna gaw bungli lu ai Ramma ni a matu ganing re ai lam yan anhte hta nga ra ai ngu ai ni hpe san htai hku nna KNCC kaw na Saranum Lahpai Htu Raw hpe saw shaga da ai re nga nna tsun ai.
Yaw shada ai lam gaw Hpyen yen Dabang langai hte langai Makri shawn ai hte Hpa lam hta mung myit mang hkrum ai hte galaw sa wa lu na matu, Shingan de nlu pru ai ramma ni law law wa nga ai re majaw Ningbaw Ningla hte Mying kaba nga ai Sarakaba ni hte hkrum zup lu na ahkaw ahkang nnga ai Hpyen yen Dabang na ramma ni hpe myit n gaji mat u ga myit ndaw hten mat u ga tinnang a lam hpe galoi mung dating let jaw ang hkrak ang ai de du wa lu u ga, Myu sha lam yan hta grau nna ap nawng daw jau shang lawm lu na matu, hpyen yen ai ramma langai rai ti mung tinnang lagaw tinnang tsap ai hte tinnang prat hpe asum njaw ai sha galaw sa wa lu na matu yaw shada nna galaw ai lam re nga nna Rev. Dingsi Tu San Awng matut tsun ai
Ya ten hta gaw ja gum hpraw mung hpa lam hta mung grai yak hkak ai aten ladaw re majaw ndai amu bung li kaba hpe byin tai hkra woi galaw ai lam gaw ramma ni hpe tinnang a sak hkrung lam hta lama mi sha pi mu la chye la nna tinang a sak hkrung lam hta kaja wa nan akyu jashawn ai lamang rai u ga, dai majaw shara shagu de na rammma ni yawng hkra ahkum ara sa du shang lawm shangun mayu ai re. Dai ning na ramma sharin hpawng hta gaw Hpyen yen ramma ni sha n ga Jau Man ramma ni hte ginwang ginjaw ramma ni, pa layang de hpyen yen ai ramma ni yawng hpe mung saw shaga lajin dat ai re lam chye lu ai.
Jarit mayan hpyen yen ramma sharin hpawng hpe 1 lang ngu na sharin hpawng hpe gaw 2014 ning hta Mungga Zup kaw galaw ai, 2 lang ngu na sharin hpawng hpe gaw 2015 ning hta Maga Yang hpyen yen Dabang kaw galaw ai, 3 lang ngu na sharin hpawng hpe gaw 2016 ning hta Je Yang hpyen yen Dabang kaw galaw ai, 4 lang ngu na sharin hpawng hpe gaw 2018 ning hta gaw Alen Bum lahta tsang jawng kaw galaw ai re lam chye lu ai.
