3 lang na Myusha Gintawng Karate shing jawng lamang galaw
3 lang na Myusha Gintawng Karate hpung ni a shingjawng lamang hpe Myusha Gintawng yu reng komiti ni woi awn nna Laiza Muklum Sinpraw Majoi gawknu hta April shata 5 ya shani kawn April 6 ya shani du hkra 2 ya tup galaw na re lam chye lu ai.
Karate shingjawng ai hta asak pang hte weight garan nna shing jawng ai hku re. Asak 10 ning npu na Ma ni hpe mung Num/La garan da ai raitim ndai lang shingjawng ai hta gaw Num nlawm ai La hkrai rai nna asak 11 ning hte12 ning ni gaw Num/La garan da ai, weight kaba ai hte weight gaji ai ni n ang na matu kilo tan ni garan nna hpan 2 hku ginsup shingjawng ai. Asak 13 ning kaw na 18 ning ni hpe mung pang garan da ai dai ginsup shingjawng poi hta asak kaba dik pang gaw 23 ning du hkra na ramma ni lawm ai lam chye lu ai.
“Yaw shada ai lam gaw Myen Mung hte Mungkan madang hku wa htawng ai shaloi anhte Jinghpaw myusha ma ni mahkrum madup law law lu na matu, hkamja zetlet na matu hte nanghpam lu sha hpe koi yen lu na matu hpan 3 hpe madung tawn yaw shada nna galaw ai re” nga nna Sara Bashi Bawm Zung tsun ai.
Ndai Myusha karate ginsup hpung hpe lai wa sai 2013 ning hte 2014 ning hta Sarakaba Sinwa Awng hku nna woi hpaw hpang wa ai re. Sarakaba Sinwa Awng nnga mat ai hpang shi kanau Sara Hkun Naw hku nna bai woi awn let yawng rau jawm galaw wa ai re, nga nna sara matut tsun ai kaw na chye lu ai.
Amyusha gintawng karate sharin ai lam hpe Laiza, Hpa-Awn Shalat Jawng, Immigration, Je Yang, Mai Ja Yang hte Myitkyina maga de sharin nga ai lam chye lu ai.
