Myen hpyen dap ni mungmasha hpe adup zing-ri san jep ai lam galaw nga
KIA Dap Ba 9 Dap Dung 44 ginra, Bau Dum Bum hte Jebu Hka makau na Salang Lamung Gun a sun sin ya ai, Ka Mai mare Maji Lawk na mungmasha Salang Zahkung Sin Gan hpe Ma U Pin kaw nga ai Myen hpyen dap Hk.M.Y 11 na hpyen la ni April shata 6 ya shana hkying 8:00pm aten hta adup, htawng, san jep da ai lam na chye lu ai.
“Myen hpyen la ni gaw Salang Zahkung Sin Gan hpe KIA ni gara kaw nga ai rai ngu san jep nna myi man kaw 2 lang htawng ya, sinat hte mung 3,4 lang adup ya ai shi hpe woi mat ai lam gaw nnga ai” nga nna buga na Salang langai tsun dan ai.
April praw 7 ya shani hta mung, Mungmyit Sinli Ga ( Kachin Sub-state ) KIA Dap Ba 6 Dap Dung 9 ginra, Dima mare kaw du nga ai Myen Dapnu 99 kata na hpyenla ni gaw, Dima mare masha ni a U, N-gu ni hpe jahkrit shama, shagyeng shakat di nna kam mara gapsha, rimsha, ya nga ai lam, buga masha ni kawn chye lu ai.
