5th lang na ginjaw ginra, ginwang ginjaw jarit mayan hpyen yen ramma ( GJHR ) shawa hkrum zup sharin bawngban hpawng hpe angwi ahpyaw hte galaw la lu
5th lang na ginjaw ginra, ginwang ginjaw jarit mayan hpyen yen ramma ( GJHR ) shawa hkrum zup sharin bawngban hpawng hpe Alen Bum Lahta Tsang Jawng kaw angwi apyaw galaw la lu ai hte April shata 8 ya shani manam zup 12 ya shana de ap nawng hpawng galaw nna April 13 ya shani manam bra na re lam chye lu ai.
Ndai ramma hkrum zup sharin bawngban hpawng hpe 4 ya tup galaw ai rai nna, Ramma hte ginru ginra labau, Ramma hte shawng lam hpaji, Ramma hte mungmasa, Ramma hte magam bungli, Tara Upadi hte seng ai lam, Simsa lam hte seng ai lam ni hpe sharin ya ai re.
Sharin hpawng hta Wunpawng Mungdan Shanglawt Kongsi Ningbaw Malai ( I ) hte Wunpawng Mungdan Shanglawt Kongsi Ninggawn Amu Madu Salang Kaba Kumhtat Hting Nan yan kaw nna mung, ramma ni hpe sa du n-gun jaw sharin ya ai lam chye lu ai.
“Tinang lagaw tinang tsap, lahpa galai la lu ai ramma ngu ai pan dung kata kaw, yaw shada lam 3 tawn ai. ( 1 ) Ramma ni langai hte langai dabang shada mahkri shawn myithkrum mang-rum ai lam hpe hkam la lu na matu, ( 2 ) Shinggan de nlu pru, tsan ai shara de nlu sa ai dabang kata kaw sha nga nna ra ai magam lit, mungdan lit ni hpe gun hpai nga ai ramma ni hpe shingan na sara ni hte ningbaw ningla ni hpe jahkrum ya ai lam, ( 3 ) Anhte grau nna Myu hte Mungdan hpe tsawra let, grau nna shang lawm ap nawng daw jau gun hpai gwi ai ramma ni byin tai wa na matu re” nga nna jarit mayan ramma ningbaw Rev. Dingsi Tu San Awng tsun dan ai.
Dai ning na ramma shawa hkrum zup sharin bawngban hpawng gaw ginjaw ginra na hpyen yen ramma ni hkrai nre sha, Sinpraw Ginwang Ginjaw, Mai Ja Yang maga de na hpyen yen ramma ni, Myu mare de du nga ai dakkasu jawngma ni hte hpyen yen nre ai mare hkan na jauman masha ramma ni hpe mung dep hkap ai daram saw shaga nna galaw ai hta du sa ai ramma yawng marai 1030 re lam chye lu ai.
Jarit mayan hpyen yen ramma hkrum zup sharin bawngban hpawng hpe lai wa sai 2014 ning April shata kaw nna galaw hpang ai re. Ndai sharin hpawng hpe shaning shagu galaw ai re lam chye lu ai.
