KIA hte Myen hpyen hpung ni shara 2 hta laja lana gasat gala majan byin
Mungmyit Sinli Ga ( Kachin Sub-state ) KIA Dap Ba 6 Dap Dung 9 ginra hta shamu shamawt hkawm nga ai Myen Dapnu 99 kata na Hk.M.Y 418 dap na hpyen hpung ni hte KIA Dap Dung 9 na hpyen hpung ni April shata 18 ya shani shara 2 hta laja lana gasat gala majan byin ai lam na chye lu ai.
Dapnu 99 kata na Hk.M.Y 418 dap ni gaw Dima mare kawn anhte nga ai maga de lung wa ai majaw, Mungli Nam Jang Pa lahta Gadung Kawng kaw dai hpawt hkying 9:47am kawn shani ka-ang hkying 12 aten daram du hkra gap hkat ai, nga nna shawng lam na Salang langai shana wa ai.
Daknai mare kawn pru wa ai Hk.M.Y 418 dap na hpyen hpung ni hte KIA Dap Dung 9, Kung 4 hpyen hpung ni mung, Daknai mare kawn Lunghtang mare de lung wa ai lam numshe kaw gap hkat ai re lam, Salang wa tsun ai.
Ya aten hta Myen hpyen dap ni gaw gasat gala majan byin ai shara de hpyen n gun jat na matu, Namhpakka mare kawn hpyen modo 4 kaw hpyen la hpring hpring htaw nna lung wa sai lam, shawng lam shi sawk ni kawn chye lu ai.
