KIA Dap Dung 36 ginra hta Myen Dapnu 99 kata na hpyen hpung ni hte KIA hpyen hpung ni shara 2 kaw laja lana gasat gala majan matut byin
Mungmyit Sinli Ga ( Kachin Sub-state ) KIA Dap Ba 6 Dap Dung 36 ginra hta Myen Dapnu 99 kata na hpyen hpung ni KIA hpyen hpung ni April shata 22 ya shani hta shara 2 kaw laja lana gasat gala majan byin nga ai lam chye lu ai.
Myen hpyen hpung ni gaw KIA hpyen hpung ni shara jahkrat nga ai Mungbaw, Yi Hku Kawng de htu shadut lung wa ai majaw, jahpawt hkying 8:00am aten kawn shani ka-ang hkying 12:00non aten du hkra laja lana gap hkat ai re.
Shana maga hkying 1:30pm aten hta KIA Dap Dung 36 Headquarter ( H.Q ) Howa mare dingsa de Myen Dapnu 99 kata na hpyen n gun 100 daram bai htu lung wa ai majaw gasat gala majan matut byin ai re lam, shawng lam shi sawk ni shana wa ai.
KIA Dap Ba 6 ginra de April shata praw kaw nna Myen Dapnu 99 kata na hpyen hpung ni KIA ni shara jahkrat nga ai de htu shadut lung wa ai majaw gasat gala majan byin ai re. Ya mung Myen hpyen dap ni naw htu lung wa yang gasat gala majan gaw matut byin wa na re lam, shawng lam na lit nga ai Salang langai tsun ai kawn chye lu ai.
