Sara Zau Jat hte Sara Lum Zawng yan hkyuk htawng kaw na lawt pru
Majan kata chyat rawng nga ai mungshawa ni pru wa lu na matu lam hkawm shawa n gun madun woi ai majaw, htawng dam jahkrat hkrum ai, Sara Zau Jat hte Sara Lum Zawng yan gaw Myen Mung Gumsan Magam a htawng rawng masha ni hpe shalawt ya ai aming hte April shata 26 ya shani Sara yan mung shata 4 jan hte Myitkyina hkyuk htawng na lawt pru wa sai lam chye lu ai.
Sara yan hte rau htawng dam jahkrat hkrum ai Saranum Nang Pu gaw hkamja lam a majaw shata 6 rawng ra ai kaw na shata 4 hte April shata praw 5 ya shani lawt pru wa ai re.
Sara Zau Jat, Sara Lum Zawng hte Saranum Nang Pu ni gaw majan kata chyat rawng nga ai mungshawa ni lawt pru wa na matu lam hkawm shawa n gun madun woi ai majaw, Myen hpyen dap hpe sari jahkrat ai ngu nna, nying suzi pukma 500 hte Myen hpyen du Du Kaba Myo Min Oo kawn tara jawat da ai re.
Sara Zau Jat, Sara Lum Zawng hte Saranum Nang Pu ni hpe lai wa sai 2018 ning December shata praw 7 ya shani hta Myitkyina tara rung kawn htawng dam shata 6 hte gumhpraw dam Sen 5 hpra jahkrat hkrum ai rai nga ai.
Myen Htunghking shaning ningnan masat masa hku nna shinggyim nauna myit hte Myen Mung shara shagu hta hkyuk htawng sharen da hkrum ai htawng masha ni yawng marai 6948 hpe rit kawp tara ntawn ai sha Gumsan Magam Salang Win Myint a aming hte shalawt hkrum ai re lam chye lu ai.
