Simsa lam a matu Myen asuya hte KIO ni bawngban na nhtoi lani mi sha ra ai kaw KIA hte Myen hpyen dap ni shara 2 hta gasat gala majan byin
Simsa lam a matu Myen asuya hte KIO ni bawngban na nhtoi lani mi sha ra ai kaw, Mungmyit Sinli Ga ( Kachin Sub-state ) KIA Dap Ba 6 Dap Dung 9 ginra hta KIA hte Myen hpyen dap ni April shata 29 ya shani shara 2 kaw gasat gala majan byin ai lam na chye lu ai.
“Dai hpawt hkying 9 aten daram kaw na Zelan ntsa Namti mare dingsa kaw chying daw mi gap hkat ai, dai hpang hkying 2 aten kaw nna Hkumung mare ntsa Kawngmu mare dingsa kaw minute 45 daram du hkra gap hkat ai” nga nna shawng lam na Salang langai shana wa ai.
Myen hpyen dap gaw Ts.K.Hk 7, Hk.M.Y 427 dap na hpyen n gun 50 daram hte Dapnu 88, Hk.L.Y 10 dap na hpyen n gun 70 daram re lam chye lu ai.
Myen hpyen dap ni htu lung wa ai majaw hkap shingla gasat ai re, ya mung shanhte naw htu lung wa yang gasat gala majan gaw matut manoi byin wa na re lam, Salang wa tsun ai.
Dai hpawt April shata 29 ya jahpawt hkying 8:00am aten hta Laiza Muklum Sinpraw Majoi Manau Gawknu kaw KIO Ningbaw Kaba Du Daju Jum Nba La kaw nna mungshawa yawng marai 1000 jan hpe sang lang hpawng galaw ai re.
Dai sang lang hpawng hta gap hkat jahkring na lam, hpyen yen ni nta buga de bai nhtang wa na lam, NCA hte seng nna matut nna bawngban sa wa na lam ni hpe sang lang dan ai.
Hpawt ni April shata 30 ya shani hta gaw Myen Asuya National Reconciliation and Peace Center ( NRPC ) hte KIO ni Muse Muklum kaw bilateral gap hkat jahkring lam hte seng nna bawngban na re lam chye lu ai.
