KIA Dap Dung 9 ginra hta Myen hpyen dap hte KIA ni gasat gala majan matut byin

Mungmyit Sinli Ga ( Kachin Sub-state ) KIA Dap Ba 6 Dap Dung 9 ginra, Namti mare dingsa kaw April shata 30 ya jahpawt hkying 5:50am aten daram hta Myen hpyen dap Hk.L.Y 427 na hpyen hpung ni hte KIA ni gasat gala majan matut byin ai lam chye lu ai.

“Myen hpyen hpung ni htu lung wa ai majaw gasat gala byin ai rai nga ai, ya mung naw matut lung wa yang ngoi ding yang rai na re” nga nna shawng lam kaw nga ai Salang langai tsun dan ai.

KIA Dap Ba 4 hte Dap Ba 10 ginra hta mung, Myen hpyen dap ni gaw KIA hpyen hpung ni nga ai shara hte kade ntsan ai hkan hpyen n gun hkying lam htu da ai lam, shawng lam shi sawk ni kawn chye lu ai.