Dingdung daw amyusha rawt malan uhpung 4 hte Myen asuya simsa lam komiti NRPC ni hkrumzup bawngban hpawng galaw

Mungmyit Sinli Ga ( Kachin Sub-state ) Muse Muklum kaw daini April shata 30 ya shani hta dingdung daw dap hpawm wuhpung 4 hte Myen asuya simsa lam komiti NRPC ni hkrumzup bawngban hpawng galaw ai lam chye lu ai.

Hkrumzup bawngban hpawng hta Myen asuya simsa lam komiti ningtau ningbaw U Thing Zaw woi awn ai salang ni hte KIO/KIA, PSLF/TNLA, ULA/AA hte MNDJP/MNDAA na dat kasa salang ni shang lawm ai re.

FPNCC na “Wa” UWPS, “Sam” SSPP hte “Mailar” NDAA amyusha laknak lang rawt malan uhpung na dat kasa salang ni mung, bawngban hpawng kaw sa madat lawm ai lam nga ai.

Dai hkrumzup bawngban hpawng hta simsa lam hte seng nna lahkawng maga bawngban la lu ai rai nna, gap hkat jahkring bilateral sen htu ai lam hpe gaw hpang kalang bai hkrum bawngban ai shaloi she lu htu hkra shakut sa wa na re lam, amyusha rawt malan dat kasa salang ni tsun ai.

Hpang kalang na hkrumzup bawngban hpawng hpe gaw, du wa na May shata htum wa maga bai hkrum bawngban na re lam chye lu ai.