Wunpawng Mungdan Shanglawt Asuya Ginjaw Hpaji Dap kawn 2018-2019 hpaji ladaw tsang 10 awng jahpan ndau
Wunpawng Mungdan Shanglawt Asuya Ginjaw Hpaji Dap kawn 2018-2019 hpaji ladaw tsang 10 awng jahpan hpe May shata praw 5 ya jahpawt hkying 6:00am aten hta san poi htai ai ginra ni hta ndau shahpraw da ai lam chye lu ai.
Tsang 10 san poi hpe N-Gum La lahta tsang jawng, Laiza lahta tsang jawng, Alen Bum lahta tsang jawng, Mai Ja Yang lahta tsang jawng, Mungmyit Sinli lahta tsang jawng hte Nba Pa lahta tsang jawng na jawngma yawng marai 691 htai ai kaw na marai 356 awng ai re.
Lahta tsang jawng 6 kaw na dawnjan ginhpan ( Distintion ) lu ai marai 28 hta law malawng Economic rai nna, dawnjan ginhpan 3 lu ai marai 1 re dai gaw Economic, Chemistry, Matchematics re. Top 10 shang ai hta marai 2 gaw ginrun masat lu ai re hpe Ginjaw Hpaji Dap tsang 10 san poi san jep hpung ni ndau da ai kaw na chye lu ai.
“Awng ai tsahtam shadang gaw maning na hta nga yang dai ning gaw jat ai, maning gaw tsahtam shadang 50.17 re dai ning gaw tsahtam shadang 51.5 re” nga nna Ginjaw Hpaji Dap Ningtau Amu Madu, Tsang 10 San Poi Jep Chyoi Amu Madu Sara Kaba Nhpum Tang Gun tsun ai.
KIO tsang 10 awng lakmat hte maigan jawng Miwa Mung Mangshi, Bangladesh hte India jawng de mai lung ai. Matut nna Ma ni a shawng lam a matu ladat gaw shaw taw nga ai, master janmau wa la sai ni a shara ni de lu lung na matu shakut nga ai lam, Sara Kaba tsun ai.
Wunpawng Mungdan Shanglawt Asuya lahta tsang jawng 7 nga ai kaw na Mai Ja Yang, Htoi Ningshawng lahta tsang jawng hta gaw tsang 10 san poi jep chyoi ya na masha nnga shi ai sha n-ga tsang 10 jawngma mung nlaw shi ai majaw, Mai Ja Yang lahta tsang jawng hte ginrun ai lam chye lu ai.
