Jawngma langai bawm kabye kapaw la ai majaw asak si sum
Manje Ninghtawn, Maji Gung hte Hka Chyang mare lapran na Zaibru Hkyet mayan kaw May shata praw 9 ya shana maga hkying 5:30pm aten daram hta jawngma langai bawm kabye kapaw la ai majaw asak si sum mat ai lam na chye lu ai.
Dai jawngma gaw Man Win Gyi mare makau na Pung Ling Dingsa mare kaw na Salang Manam La Ja hte Nbrang Hkawn Hpang yan a kasha shadang Philip Brang Nan asak 17 ning rai nna Man Win jawng kaw tsang 8 htai awng da ai, shan nu wa ni gaw Man Win mare RC 1 hpyen yen dabang kaw nga ai re.
Bawm kabye kapaw la ai mabyin hte seng nna, Manje mare na Salang langai ya na zawn tsun dan ai.
“Maji Gung hte Hka Chyang Hku lapran de maling shanam hpun hpyi gawng hkawm na hku rai nga ai, shanhte zahpaw lung wa ai gaw marai 5 rai ma ai, masha garan nna hkawm ai shan 2 gaw hpun hpyi gawng hpai nna cycle tawn da ai shara du na matu lalam 3 daram sha ra ai kaw bawm kabye kapaw la na hku rai nga ai shi manang gaw hpa nra ai, shi manang wa gaw hkala ai wa hpe cycle hte Hka Chyang Hku mare de htaw wa yang dai kaw na sarama gaw machyi masha ndai tsang ra ai ngu nna Maji Gung Myen hpyen dap kaw sa tsun yang machyi masha woi sa wa marit nga nna ningma ni hkap kashin ya tsi ni noi ya nhtawm Manje tsi rung kaba de shalai dat ma ai shana yup tung hkying 12:30am daram hta du ma ai, Myen Balik hte Ts.Y.Hp ( Kaichyan ) ni jep san nga yang minute 10 na ai hpang Ma dai nnga mat sai”
Moi mang hpe gaw May shata 10 ya shana daw hkying 1:30pm aten daram hta Manje Hkristan lup ding lup wa de makoi mayang akyu hpyi hpawng galaw kau sai lam chye lu ai.
Ya bawm kabye kapaw la ai shara hkan shawoi gaw nbyin ga ai, ndai shara KIA Dap Ba 3 Dap Dung 27 ginra gaw re. Raitim dai shara hkan KIA ni nnga ai laning mi jan rai sai, ya gaw dai ginra hta Myen hpyen dap wa jung nna Byuha Mu wa dung ai shara re lam, salang wa matut tsun ai kawn chye lu ai.
