Sut hpaga gat lawk hpaji hte seng nna ramma ni sharin hpawng galaw la
Manmaw Ginwang Hkalup Hpung Hkristan Hpaji Dap hte Ramma Komiti ni woi awn nhtawm, sut hpaga gat lawk hpaji hte seng nna ramma ni a sharin hpawng hpe May shata 14 ya shani kawn 16 ya shani du hkra, masum ya tup Manmaw Ginwang Robert Ninghtan Hpung 100 Ning Hpring Masat Gawknu kaw galaw la lu sai lam chye lu ai.
Sharin Sara gaw Sara Lazing Sunday Htoi Shawng hte Saranum Myitung Seng Pan yan rai nna, sharin hpawng a yaw shada lam hpe Manmaw ginwang ramma hpu-awn Sara Kareng Htoi Awng kaw nna ya na zawn tsun ai.
“Ramma ni gat lawk hpaji hpe chye galaw sha wa na matu, bungli lu na matu ၀န္ထမ္း sha galaw na nre sha, Maigan amyu masha ni zawn gat lawk hpaji, hpaga ga ai hpaji hpe atsawm sha chye galaw wa na matu yaw shada ai re”
Sharin hpawng hta jan mau gup sai ramma ni, jan mau n gup ai ramma ni hte jawng nlung mat sai ramma ni yawng marai 29 sharin hkamla sai re. Ndai sharin hpawng gaw shawng ningnan lang rai nna matut galaw sa wa na masing ni mung naw nga ai lam, Sara tsun ai kawn chye lu ai.
