Manmaw buga hkalup hpung Min Hla hpung lawk kaw media sharin hpawng galaw

Manmaw Ginwang Mu Na Kyit Hkai hte Laili Laika Komiti ni woi awn nhtawm, Manmaw buga hkalup hpung Min Hla hpung lawk kaw media sharin hpawng hpe May shata 20 ya shani manam zup nna 29 ya shani manam bra, sharin ninghtoi 8 ya galaw na re lam chye lu ai.

Mying jahpan hte lusha a matu 8 ya na 40, 000 ( mun mali ) la sa ra na arung arai ni gaw, Camera, Computer Leptop ( lu yang ), tinang galoi mung lang nga ai tsi mawan, arung arai ni hte nba kaji langai, sharin ya na ginhpan ni, basic journalism, sumla shatsawm hpaji, sumla dem hpaji, documentary hte photography ni re.

‘Ginwang shagu kaw nga nga ai ramma ni magam gun ni hku nna, tinang nga ai shara kaw hpabaw shiga ni nga ai hpe atsawm sha chye hka ja let, gara gaw jaw ai njaw ai ngu ai, tengman ai lam hpe lu la na matu tsun ga nga jang, ya gaw media prat re majaw media hte bungli galaw na matu yaw shada ai lam re’ nga nna Mu Na Kyit Hkai hte Laili Laika Komiti Hpu-Awn Sara Kareng Htoi Awng tsun ai.

Media sharin hpawng gaw ndai lang hte rai yang 5 lang rai nna ramma yawng marai 10 jan sa du sharin hkamla nga ai lam chye lu ai.