1 lang na Jinghpaw laika ladat nnan sharin wunkat galaw

Manje Ninghtawn Laili Laika hte Htunghking Hpung ni woi awn nhtawm, Manje ninghtawn kata hta Jinghpaw laika hpe sharin ya nga ai sara/num ni hpe May 27 ya shani kaw nna 29 ya shani du hkra, 1 lang na Jinghpaw laika ladat nnan sharin wunkat galaw nga ai lam chye lu ai.

Sharin ya ai ni gaw, Saranum Waje Nan Shawng, Saranum Labya Ji Tawng, Saranum Maran Roi Ji hte Saranum Labang Htu Seng ni rai nna, Manje Ninghtawn Htunghking wang kaw sharin ya nga ai re.

‘Yaw shada lam gaw asuya jawng kaw mung, ladat nnan hkrai sharin mat wa sai re majaw, anhte amyusha ni mung ladat nnan hku sharin lu na matu re’ nga nna Manje mare na mying nshadawng ai Salang langai tsun dan ai.

Sharin hkamla ai ni gaw ta tut jawng sara galaw nga ai ni hte ginhtawng jawngdat aten hta Jinghpaw laika hpe sharin ya nga ai sara/num ni re. Manje ninghtawn kata hta nawku hpung shagu hku na mung ginhtawng jawng Jinghpaw laika ni hpe hpung 4 du hkra sharin ya nga ai lam, Manje mare masha ni kawn chye lu ai.

Wunkat hta Manje ninghtawn kata na mare kahtawng ni rai nga ai, Manje, Munghkawng, Munglu Hpaga Rai, Madang Yang, Shawnghtawk, Yihku Manhkam, Ga Ra Yang, Je Sawn hte Munglu mare hkan na sara/num ni yawng marai 90 jan sharin hkamla nga ai lam chye lu ai.