Mungding Pa mare de bai nhtang wa ai hpyen yen ni laika sharin jawng hpaw na ahkang nlu

Majan a majaw Manmaw Hpangga Kawng kaw hpyen yen nga ai Manje Ninghtawn Mungding Pa mare na htinggaw 50 jan gaw laika sharin jawng hpaw na matu, Manje ninghtawn asuya uphkang du kaw ahkang sa hpyi yang ahkang njaw ai lam chye lu ai.

Mungding Pa mare kaw na Salang nkau hte Manmaw ginwang asuya hpaji du ni, May shata 31 ya shani Mungding Pa kaw jawng hpaw na matu, Manje ninghtawn Myen asuya uphkang du kaw, sa tsun yang ‘simsa ai lam nnga shi ai majaw jawng hpaw na matu hkam daga nlu jaw ai’ ngu tsun dat ai lam, Manje mare na Salang langai tsun dan ai.

Mungding Pa mare kaw wa nga ai mungshawa ni gaw Manmaw Hpangga Kawng hpyen yen dabang hta nga ai ni re. Camp kaw na wa na ahkang gaw njaw ai raitim shanhte wa na nga yang gaw ahkang jaw ai, Mungding Pa kaw jawng nlu hpaw yang gaw, jawngma ni grai yak hkak na re hpa majaw nga yang jawng grai tsan ai nga nna, Salang wa matut tsun ai.

Mungding Pa mare hta Myen asuya laika sharin jawng hpe lapran tsang du hkra hpaw ga sai rai nna, Myen hpyen dap hte KIA ni majan bai byin wa ai majaw lai wa sai 2013 ning hta laika sharin jawng hpe jahkring kau ai re.

Ya aten hta Mungding Pa mare kaw bai wa nga ai mungshawa htinggaw 50 jan hta nkau gaw hpyen yen kaw mying jahpan naw rawng ai ni lawm ai, nkau gaw tsepkawp pru mat sai ni re. Ya na zawn mare buga de wa nga lu na matu Sara Maraw Brang Mai kaw nna komiti woi hpaw nna galaw wa ai re lam chye lu ai.