Gangdau Yang buga hpung masha ni mare wa gawan a kyu hpyi hpawng galaw

Sama Ginwang , Gangdau Yang buga hpung masha ni gaw tinang a buga mare de wa nna mare gawan akyu hpyi hpawng hpe June shata 1 ya shani galaw ai lam chye lu ai.

Mare wa gawan ai hte seng nna Gangdau Yang buga na lit nga ai salang langai  ya na zawn tsun ai. “ shawng nnan gaw KBC nawku hpung hku nna wa na hku hkyen da ai raitim, wa na shani she laga nawku hpung ni Buddha, RCM, Madung Hpung  hte Hka Lup Hpung ni mung lawm ai majaw a kyu wa hpyi ai re. Anhte na yaw shada lam gaw nawku jawng kata de shang nna kyu wa hpyi na ngu myit nna wa ai rai tim, seng ang ai Myen hpyen dap ni kaw anhte jau jau ahkang nhpyi da ai majaw ahkang  njaw ai majaw Ja Hka lam nbraw kaw sha akyu jawm hpyi rai nna bai wa mat ai re” nga nna tsun ai.

Anhte Gangdau Yang Buga KBC nawku hpung, Amu Madu woi awn nna anhte nawku hpung masha ni mare buga nwa yu ai grai na sai re majaw, anhte nawku hpung hku nna sha pi galang mi wa gawan yu ga, nwa nga tim nawku jawng ni mare dum nta ni wa gawan ai hku sha pi galaw yu ga ngu nna galaw hpang sa wa ai bungli re. Seng ang ai ni shanhte tsun ai gaw masha kaba ni mung nnga taw ai re, anhte mung Bawm ni hpa ni nlu seng ya shi ai shim lam nlu jaw, lit nlu la ya shi ai majaw mare kata de shang na ahkang n jaw ai re nga nna salang wa matut tsun ai.

Gangdau Yang buga hpung mare masha ni mare de wa gawan ai lam gaw wa nga na matu nre sha mare buga wa gawan kyu hpyi la ai re lam, du na shaning nnan Christmas poi hpe Gangdau Yang Buga hta galaw mai ai hte buga masha ni yawng shang lawm nna galaw na re lam chye lu ai.