Nam San Yang hta asuya Lapran tsang jawng hpaw hpawng lamang galaw
Nam San Yang hta asuya lapran tsang jawng hpaw hpawng lamang hpe June shata 6 ya jahpawt 10:30am aten kaw nna shani hkying 12:00pm aten du hkra galaw ai lam chye lu ai.
Jawng hpaw hpawng lamang hta Jinghpaw Mungdaw Hpaji Du woi awn nna Waimaw Ginwang Asuya uphkang Du hte Ginwang Ninghtawn madang na Asuya hpaji Du ni sa du shang lawm ai hte laika sharin sara/num marai 13 hpe ap ya ai lam chye lu ai.
“Ndai shara kaw hpyen majan a hpang shawng nnan hpaw hpang ai shara re majaw sharin sara /num ni mung sa na matu yawng hkra hkrit tsang ai hkrai re raitim yak hkak ai lam nnga ai sha ndut ndang alum ala rai kahtawng masha ni hte hkrum tsup lu ai majaw myit pyaw ai hte kabu kara ai lam hpe tsun ma ai re. Madi shadaw ai lam hta gaw jawngma ni a matu maisau laika buk hte laika kanu ni hpe garum ya ai re” nga nna Salang Hpaula Gam Hpang tsun dan ai.
Dai ni du hkra jawng mying hta da ai jawngma ni gaw KG kaw nna tsang (8) du hkra rai yang jawngma ni yawng marai 202 tup re. Jawngma grai law wa na re ngu nshadu da ai majaw Boarder hpaw na masing nnga ai raitim asuya a tara shang jawng hpaw wa na re majaw dum nta nlu mat ai Kanu Kawa ni a kashu kasha ni grau law taw ai re majaw ya ndai Boarder gaw lak san ya hkyak hkyak Foundation jahkrat nna shachyaw ding yang re.
Ya ten gaw jawngma ni hpe nawku jawng, Mashalet jawng hte Wajau ni a nta hkan tawn da ai, Boarder up marai 6 san da nna ma ni hpe yu reng ai lam galaw ai re. Boarder hpe gaw Sing Paw Boarder ngu masat da ai re hta Boder nga jawngma yawng 160 rai nna Jawngma ni yawng hpe Boarder manu lu sha manu hku nna marai langai hta gumhpraw lap 250000 ( Sen Lahkawng Mun Manga ) hpe rap ra ai hku jahkrat ya ai hku re. Ndai gumhpraw jawng ngut du hkra na rai nna ngam ai gaji gajaw ra ai lam hta gaw Nawku hpung hku nna mung anhte yawng jawm madi shadaw na matu lajang nga ai re. Boarder kaw makam masham n ging hka ai, amyu bawsang nlata ai sha yawng hpe hkap la ai, yak hkak ai lam gaw Hka hkyet mat ai aten ladaw re majaw Lu hka hte lang hka, yup shara ni yak hkak taw ai, nga nna Salang wa matut tsun ai.
Nam San Yang jawng kaw sa lung ai jawngma ni gaw Je Yang, Hpun Lum Yang, Woi Chyai, Munglai Hkyet hpyen yen hte Wuyan San Pya, Maina IDP camp hkan na jawngma ni re lam chye lu ai.
