Sumsing Chyeju Band hte Heaven Grace kaw nna woi awn let Music jawng hpaw na hkyen lajang nga
Mungmyit Sinli Ga ( Kachin Sub-state ) Mungmau Ginwang, Munggu Buga Hkasan Marawng lawk 2 hta Sumsing Chyeju hte Heaven Grace kaw nna woi awn let Music jawng hpe June shata 15 ya shani kawn hpaw hpang nna shata 5 tup sharin sa wa na hkyen lajang nga ai lam chye lu ai.
Music jawng hpaw hpang wa ai a yaw shada lam hpe Sara Jawnchaw Ting Hkaw kaw nna ya na zawn tsun dan ai. “Buga na Ma ni, Ramma ni hte buga hpe sharawt ai lam re. Ndai music jawng hpe buga kaw shawng galaw nhtawm, Myen mung hta nga ai music jawng ni hte matut mahkai nna gau ngwi ngwi jawng kaba langai mi byin wa hkra galaw sa wa na masing ni nga ga ai” nga nna tsun ai.
Sharin ya na Sara ni gaw Munggu buga na Sara Lahpai Zau Yaw, Sara Zadau hte Sara Jawnchaw Ting Hkaw ni kaw nna woi awn sharin ya na re. Sharin gyinhpan ni gaw Drum, Keyboard,Guiter hpan hkum, Violin, recorder, madum sumhpa hpan hkum hkra hte Choir gyin shalat ai kaw du hkra sharin ya na re lam chye lu ai.
Music jawng hta sharin hkam la na jawngma ni gaw shinggan kaw na sa na ni marai langai hkum kyats 50000 ( Mun Manga ) rai nna, jawng kaw nga let sharin hkamla na ni gaw marai langai kyats 60000 ( Mun Kru ) re lam, sharin hkamla na jawngma marai 10 jan rai sai lam chye lu ai.
