Hpyen yen ladaw 8 ning hpring chyeju shakawn hpawng galaw

Laiza Muklum makau Je Yang IDP camp Lawt Ninghkawng Gawknu kaw June shata praw 9 ya jahpawt hkying 7:00am aten hta hpyen yen ladaw 8 ning hpring chyeju shakawn hpawng galaw ai lam chye lu ai.

Hpawng hta ginjaw hpyen yen lakawn lanawn kaw na jaw dat ai shatsam mungga hpe Je Yang hpyen yen dabang up Salang Kaba Lagang La Sam hti dan ai, dai hpang Rev. Nhkum Hpung San kaw nna akyu hpyi ya ai.

Hpyen yen ladaw 8 ning hpring chyeju shakawn hpawng a yaw shada lam hpe, Je Yang hpyen yen dabang up Salang Kaba Lagang La Sam kaw nna tsun ai hta “Anhte a hpyen yen Mungshawa Kanu Kawa ni mung, myit ayup akup rai mat wa ai lam hta sha n-ga na, myit marai mung grai hkrat wa ai. Dai majaw ya ndai galaw ai a marang e, shanhte a myit hpe jasu sharawt ya ai grau nna hkam sharang lu hkra ngu na, ginjaw hpyen yen lakawn lanawn kaw na jaw dat ai shanhte hpe n-gun jaw ai shatsam mungga mung hti dan rai ndai hpe galaw ga ai” nga nna tsun ai.

Yak hkak ai lam gaw lanam ta du wa sai re majaw jawng hte seng ai nga yang mung, jawng nta, jawngma ni a dung lahkum yak ai, bai nna dabang shawa yawng a matu nga yang mung dum nta grai yak hkak ai nta 200 jan byeng gram ra ai hpe tang dat yang htinggaw 10 na matu sha hkrat wa ai, nga nna Salang Kaba tsun ai.

Je Yang hpyen yen dabang hta nga ai Mungshawa nta htinggaw yawng 1500 jan rai nna, masha jahpan yawng marai 8000 jan nga ai re hpe chye lu ai.