7th lang na JLH Dakkasu jawngma ni a sharin hpawng hte hkrum zup bawng ban hpawng galaw ngut
7th lang na JLH ( Jinghpaw wunpawng laili laika hte Htunghkring hpung ) Dakkasu jawngma ni a sharin hpawng hte hkrum zup bawng ban hpawng hpe Monyin Hkalup Hpung nawku jawng wang kaw June shata 9 ya shani galaw ngut sai lam chye lu ai.
“ Bawng ban ai lam gaw anhte laning mi ngut sai re majaw ya hpang na daw de hpa ni galaw sa wa na ngu ai hte ya bai du na 8th lang na gaw Kutkai ginwang kaw bai galaw na ngu ai lawng lam 2 hku nna bawng ban la lu ai re. Yaw shada ai lam gaw anhte gaw laili laika hte htung hkring hpung ngu ai hte maren anhte wunpawng amyusha ni a laili laika hpe mung sharawt mayu ai re majaw dai ning na ga baw gaw “Amyu hpe sharawt Htung hkring hpe makawp amyusha lawt lam de nawt wa” ngu ai gabaw a lawu kaw laili laika hte htung hkring hpe makawp nna amyusha lam hpe galaw na ngu ai hpe madung grau yaw shada let bawng ban ai re” nga nna JLH ginjaw Amu Madu Shadang Tangbau Seng Di Awng tsun ai.
Hkrum zup bawng ban hpawng hta Lashio, Myitkyina, Sagaing, Yesin, Yangon, Mandalay, Monyin hte Moneyawr ginra 8 kaw na Dakkasu jawngma ni yawng marai 70 daram sa du shang lawm ai lam chye lu ai.
