Kutkai ginwang, Mandung mare kaw Ka Ni dawn jasan dabang hpe hpaw na matu galaw hkyen
Kutkai ginwang, Mandung mare kaw July shata praw 1 ya shani kawn Ka Ni dawn jasan dabang hpe hpaw sa mat wa na re lam chye lu ai.
Sara Maran Awng Mai hte Saranum Labang Nang Hkam yan woi awn nhtawm Chyum mungga hte dawn jasan ya ai lam galaw sa wa na re.
“Yaw shada lam gaw anhte nan mung wunpawng amyusha langai re majaw anhte nan Ka Ni nang hpam hta nye madu wa nan mung apart hten za mat ai, dinghku n grin mat ai, hpaga hkrat sum mat wa ai re majaw anhte grai dinghka lai wa sai re, raitim anhte karai kasang a mungga hte hkye shalawt la ai bai hkrum ai. Dai re majaw anhte zawn rai nna dinghku kaw Ka Ni a majaw tsin yam hkrum sha taw nga ai ni hpe dang di ai daram hkye shalawt ga ngu nna myit shingran yaw shada let galaw sa wa ai re” nga nna Saranum Labang Nang Hkam tsun dan ai.
Anhte gaw ding hkrai re majaw an nu wa ni hku nna dang di dang dep ai daram maning na July shata kawn ginsum kasha ni gap hpang ai hta ya du hkra pi atsawm nlu ngut kre la lu shi ai re, raitim mung ya Ka Ni dawn masha ni grai nga wa sai re majaw ya June shata kaw masha hkap la hpang nna July shata 1 ya shani kawn Chyum mungga ni sharin hpang wa na re. Num/la n lata ai num ginsum la ginsum laga lak san gap da ai re, masha masat da lam gaw nnga ai masha shang ai daram anhte daw jau sa wa na re nga nna saranum matut tsun ai.
Nga shara aten ladaw gaw shata 6 numdaw lahkawng laning mi rai nna shata 6 hpe shawng nnan kalang lung ngut ai hpang nhtoi 10 ya jawng dat ya nhtawm shata 6 bai matut lung ra na hte Dabang hta du sa wa na ni gaw, Yupra hpun nba, sut, Chyum laika, matsing ningting buk hte sabya ni tinang a lang ra ai arung arai ni la sa ra na re lam chye lu ai.
