Hpun Lum Yang hpyen yen dabang 8 ning hpring chyeju shakawn nawku hpawng galaw
Laiza makau Hpun Lum Yang hpyen yen dabang kaw hpyen koi yen nga ai 8 ning hpring chyeju shakawn akyu hpyi hpawng hpe June shata 14 ya shani Dabang Hkalup Hpung Nawku jawng hta galaw ai lam chye lu ai.
Lai wa sai 2011 ning June shata 14 ya shani gaw, Hpun Lum Yang Dabang de hpyen koi yen wa ai Mungshawa ni nnan du shang hpang wa ai shani re ai majaw, dai shani hpe masat la nna shaning shagu Dabang Nawku Hpung kaw nna woi awn nhtawm, akyu hpyi ai hpawng hpe galaw ai re lam, Dabang Hpung Up, Wa Yan Jaw Gun tsun ai.
Akyu hpyi hpawng hta hpyen koi yen ai 8 ning du hkra Karai Kasang bausin makawp maga ya ai hpe chyeju shakawn akyu hpyi ai lam, hpyen koi yen Mungshawa ni hpe garum madi shadaw nga ai wuhpung wuhpawng ni, amyusha lam hta shakut shaja nga ai ni hte KIO/KIA magam gun ningbaw ningla ni yawng a matu n-gun la ai akyu hpyi hpawng re.
Hpun Lum Yang Dabang hta hpyen koi yen nga ai Mungshawa nta htinggaw 720 rai nna, masha jahpan yawng marai 3000 jan nga ai lam Dabang Komiti ni kawn chye lu ai.
