Nalai mare na hpawmi dinggai langai roi rip sat hkrum

Manmaw Ginwang Nalai mare na hpawmi dinggai Nang Zing Kai asak 64 ning gaw June shata 17 ya shani nam de shi hkrai mati tam sa ai kaw Hku Li mare shingnawm hta roi rip sat hkrum ai lam na chye lu ai.

“Hku Li mare hte Na Lai mare gaw yep sha rai nga ai. Mani shi hkrai Kamu Mati tam hkawm ai kaw byin ai re. Gara ten kaw byin ai re hpe nchye ai, moi mang hpe gaw shana maga de mu ai raitim labu palawng ni yawng ashep taw ai, myi man ni mung kahtam hkang hkrai rai nna mu ai re. Moi mang hpe pyada ni htaw mat nna jep yu yang roi rip nna sat da ai lam dan dawng ai nga tsun ma ai” nga nna Sara Paw Lu tsun dan ai.

Moi mang hpe gaw nta de bai htaw wa nna June 19 ya shani hta makoi mayang na hku hkyen lajang nga ai lam, Roi rip nna sat da ai wa hpe gaw nchye lu shi ai re lam, pyada ni kawn mung matut sagawn nga ai lam na chye lu ai.