Kachin State People’s Party (KSPP) a rung hpaw lamang galaw
Kachin mungmasa party 3 pawnghpawm ai KSPP party nnan a rung hpaw lamang hte Singbord sharawt akyuhpyi la ai lam hpe Myitkyina Yuzana lawk, KSPP party rung daju shara kaw June shata 22 ya shani galaw la lu sai lam chye lu ai.
“Tara shang mungchying masat lu ai Party nnan hkalum ahkyuhpyi hpawng lamang hpe du wa na July shata 20 ya shani Shatapru Manau Wang, Majoi Gawknu kaw seng ang ai mungdaw asuya Du Slg ni hte mungchying shawa ni hte rau ahkum ara galaw sa wa na lam mung nga ai re”nga nna KSPP Ningbaw Dr Manam Tu Ja tsun ai kaw na chye lu ai.
Daini na lamang gaw Party a magam bungli hpang lu na matu, ni nawn ai Myitkyina kata nga ai Myitsu Salang ni hte rau akyuhpyi la ai lam rai nna, Ginwang shagu de rung ginran hpaw sa wa nhtawm, Party kawn mung tara shang magam bungli hpe wang lu wang lang galaw lu sana re nga nna Dr Manam Tu Ja shi a ningmu hpe matut tsun dan ai.
Ndai KSPP party gaw June shata 7 ya shani tara shang Jinghpaw mung kaw mungmasa Party langai hku Mungchying masat lu la ai Party rai nhtawm, mi na KSDP rung shara jahkrat da ai kaw KSPP rung nnan shara hpe bai masat shagrin da ai lam chye lu ai.
