Pang ( 7 ) Sarawun jawng yu hpawng galaw
Wunpawng Mungdan Shanglawt Asuya Mungdan Hkamja Dap kaw nna hpaw sharin ya ai Pang 7 Sarawun jawng yu hpawng lamang hpe Laiza Muklum Ginjaw Hkamja Dap, Wun Jat Gawknu kaw July shata 9 ya shani hkying 10:00am aten hta galaw ai lam chye lu ai.
Sarawun Jawng yu hpawng hte seng nna Mungdan Hkamja Dap, Ningtau Amu Madu, Jawng Wunkat yu reng Komiti Ningbaw Dukaba Kadang Manau Tu Awng ya na zawn tsun ai.
“Dai ni jawng awng pru ai DMP ( Diploma of medical professional ) hte jawng yu Sarawun ni yawng marai 55 tup re. Ndai Sarawun ni hpe gaw ginjaw hkamja dap kaw nna Miwa gum san mung dan de tsi hpaji hpe sa sharin shangun ai re. Madung gaw tsang 10 awng ai ni hpe sha hkap la ai. Tsang 10 awng nna anhte hkamja dap kaw laning mi Ningshawng tsi hpaji hpe sharin ai, Miwa ga hte Miwa laika ni hpe sharin hkam la nna Miwa Mung, Mangshi Walketional College kaw marai 9 hte BaoShan Medical College kaw marai 49 rai nna 3 ning matut sharin ai, tsi sharin ladaw gaw 4 ning jan daram re. Dai ni awng pru wa sai Sarawun ningnan ni hpe gaw ginwang ginjaw, Mungdan shara shagu hta garan bang nna tsi rung, tsi jaw gawk hpa-awn ni galaw sa wa na re” nga nna tsun dan ai.
Sarawun jawng awng pru ai jawngma pang 1 kaw nna pang 6 du hkra gaw LMP ( Licence of medical practitional ) madang hku sharin ya ai hta jawng yu sai jawngma yawng marai 177 rai nna, Pang 7 ngu na hta gaw DMP ( Diploma of medical professional ) madang hku nna daining nambat langai lang sharin ya ai re hta jawngma yawng marai 55 tup re lam chye lu ai.
Jawng yu hpawng hta saw shaga da ai Mungdan Magam Dap shagu na Magam gun Salang ni hte Pang 7 na Sarawun jawng yu ai Sarawun ni a kanu kawa kahpu kanau makyin jinghku ni yawng marai 400 jan sa du shagrau lawm ai lam chye lu ai.
