Tsan Pya hpyen yen mungshawa ni, dabang ningnan akyu hpyi hpawng galaw
Myitkyina Muklum, Tsan Pya lawk kaw shanu nga ai hpyen yen mungshawa ni gaw July shata 15 ya jahpawt hkying 9:00am aten kawn hkying 10:00am aten laman hta Rada Kawng, Htiwin mare kaw galaw da ai dabang ningnan akyu hpyi hpawng galaw ai lam chye lu ai.
“Mi gaw anhte Tsan Pya buga kaw nga ai, shanhte gawknu gap na shara nnga ai majaw Rada Kawng, Htiwin mare kaw bai galaw ya ai re. Tsan Pya Buga ni gaw shara hpe mari ya nna nta hpe gaw The Nippon Foundation, Japan garum ningtum hpung ni lit la galaw ya ai” nga nna Tsan Pya camp na Hpungtau Lahtaw Tu tsun dan ai.
Dabang ningnan hta gawknu, hka shin lawng, namdum hte nta htinggaw 32 a matu ra nrawng galaw da ya ai, Japan garum ningtum hpung ni kaw nna solor wan mung htinggaw shagu a matu jaw da ai lam, yak hkak ai lam gaw, jawngma ni jawng sa loi tsan mat ai cycle hte rai yang minute jan sa ra ai, jawngma yawng marai 65 tup re lam, Hpungtau wa matut tsun ai.
Akyu hpyi hpawng hta Janpan garum ningtum madu ni hte Myitkyina Ginwang Ningbaw Rev. Lasi Naw Bawk, Bawngring Ningbaw Hpauyam Hka Li ni sa du shanglawm ai lam chye lu ai.
