Asuya jawng ni hta Jinghpaw laika sharin na matu Sara tai sharin hpawng galaw
Asuya jawng ni hta Jinghpaw laika hpe sharin na matu Sara tai sharin hpawng hpe July shata 16 ya shani kaw nna 19 ya shani du hkra, Jinghpaw Wunpawng Htunghking Hte Laili Laika Hpung Ginjaw ( JHG ) ni woi awn nhtawm, Myitkyina Muklum, JHG rung kaw galaw ai lam chye lu ai.
Yaw shada lam hpe JHG Ningbaw Du wa Htingnan Yaw Sam kaw nna tsun ai hta “Jinghpaw laika hpe bung laika hku nna Shanglawt Asuya kaw mung lang ai, makam masham hpung kaw mung lang ai dai majaw Jinghpaw laika hpe hpang e gaw rung lang laika byin wa hkra hte Jinghpaw laika hpe Jinghpaw Mung shara shagu kaw nga ai Jinghpaw Wunpawng Amyusha ni sha n-ga Myen, Sam, Miwa ni yawng hkra anhte a laika hpe chye la mu ga ngu nna sharin ladat nnan ni hpe sharin ai re” nga nna tsun ai.
Jinghpaw laika hpe Asuya jawng ni hta sharin ya lu na matu lai wa sai 2015-2016 ning kaw nna Asuya ni hpe lang hte lang tsun ai majaw ya gaw chyinghka hpaw wa sai, shata shabrai hpe mung Asuya kaw nna jaw ya na matu Jinghpaw Mung Hkring Mang hte Jinghpaw Mung Asuya hpe tang shawn da ai lam, Du wa Htingnan Yaw Sam tsun ai.
Ndai Jinghpaw laika hpe Asuya jawng ni hta subject langai hku sharin ya na re hte jawng langai hta Jinghpaw laika hpe chye mayu ai jawngma marai 30 a lahta de rai jang Sara langai tawn ya na re lam chye lu ai.
Sara tai sharin hkamla nga ai sara ni gaw Puta-O, Sagain ginwang hte shaga shagu hkan na sara marai 50 jan du nga sai, matut nna mung naw du jat na re lam, Jinghpaw Laika sharin ladat nnan hpe sharin hkamla ngut sai sara/num yawng marai 400 jan rai sai hte ndai lang gaw pang 5 ngu na sharin hpawng re lam chye lu ai.
