Manje ninghtawn kata na hkauna pa ni hta hka yak ai majaw mam nlu hkai yak hkak nga

Manmaw ginwang, Manje ninghtawn rai nga ai Nam Yu Pa kaw hkauna galaw sha ai mungshawa ni gaw hka yak ai majaw July shata 22 ya shani du tim mam nlu hkai yak hkak nga ai lam, Manje buga masha ni kawn chye lu ai.

Hkauna pa hta hka nlu ai majaw mam nlu hkai yak hkak nga ai mare kahtawng ni gaw, Manje mare nnan kawng, Shawng Htawk, Manhpa, Chyau Hkawng hte Kung Ding mare ni a hkauna pa ni rai nna, ndai hkauna ni gaw marang hka hte hkai ai hkauna ni re.

Marang htu tim hkauna hkai na daram hka nlaw ai majaw mam nlu hkai la ai, nkau mi gaw Ka Sak kaba wa ai majaw Nam Yu hka hte htep ai ni gaw jak hte hka chyup bang da nhtawm, hpang jahpawt hkai na hkyen da timung dai shana njang ma hkra bai hkyet mat nna yak bu ma ai. Bai nkau mi gaw da ka ndat sai sha kalang dat mam nsi hpe gat hkai ai. Da ka gat ai ni gaw marang hka hpe la let a daw a chyen rai galaw nga ma ai lam, Manje mare na Salang langai shana wa ai.

Shawoi shaning hkan nga yang ndai aten kadai mam nhkai sai alap ni galai nna ring tsawm nga sai re. Ya mam kachyi mi mung nlu hkai ai nta htinggaw 20 jan naw nga ai, lai sai ten hkan gaw ya na zawn byin ai lam nna ga ai dai ning she byin ai nga nna, Salang wa matut tsun ai.

Manje ninghtawn kata sha rai nga ai, Si Kaw, Si Hkan Gyi, Tan Tada hkan na ni mung hka yak ai majaw mam nlu hkai ai rai nna, Munglu hte Jesawn hkauna hkan mung ya she hkai hkyen ai lam na chye lu ai.