Mungshawa ni htu shaw tawn ai lungseng tawng kaba 1 hpe Myen hpyen dap ni zing la kau

Hpakant, Gwihka maw kaw ta hte lungseng htu sha nga ai mungshawa ni a lungseng tawng kaba 1 hpe July shata 29 ya shani hta Myen hpyen dap, Dapnu 33 kata na Hk.L.Y 76 dap na hpyen la ni hte Balik ni sa zing la kau ya ai lam na chye lu ai.

Ton mi chyen daram namnak nga ai dai lungseng hpe Myen hpyen dap ni kawn Mungdan asuya shang gumhpraw hku nna mani jang Lunghkang mare lungseng rung de htaw la kau ai lam, Gwihka mare na Salang langai tsun dan ai.

Lungseng ndai gaw Miwa lauban langai htawk da ai nhkun kaw na rai nna dai shara gaw company ni shara na lungseng nre lam, Salang wa matut tsun ai kawn chye lu ai.

Lai sai aten hkan mung Myen hpyen dap ni kawn mungshawa ni htu shaw tawn ai lungseng ni hpe rim zing la kau ya ai lam ni byin ga ai. Dai zawn nbyin ga ai grai na sai re, ya bai byin wa nga ai lam, buga masha ni tsun ai kawn chye lu ai.