Manmaw, Myitkyina kawn Laiza Muklum de wa ai hkrunlam hkawm mungshawa ni hpe Hkali, Tukkui ana jep ai lam galaw
Wunpawng Mungdan Shanglawt Asuya Ginjaw Hkamja Dap kawn lit la nhtawm, August shata praw 1 ya shani kaw nna 30 ya shani du hkra shata mi tup, Manmaw, Myitkyina kawn Laiza Muklum de wa ai hkrunlam hkawm mungshawa masha ni hpe Munglai Hkyet Shagyit ( Gate ) kaw Hkali, Tukkwi ana jep ya nga ai lam chye lu ai.
Hkali, Tukkwi ana jep ai lam hte seng nna, Du Kaba Labang Shing Rip ( Mungshawa Hkamja Lam Matsun Up ) kaw nna tsun ai hta “ Myitkyina kaw na wa ai rai yang tinang gaw hkum kahtet nna Hkali rawng ai rai kun? Tukkwi rawng ai re kun? n chye ai le i? dai hpe anhte hkap jep yang Hkali rawng jang Hkali mai tsi jaw ai. Tukkwi rawng jang gaw kalang dat tsi rung kaw bang nna tsi tsi ya ai” nga nna tsun ai.
Tukkwi ana gaw Jigrawng gawa nna byin ai Viruses kaw na byin ai Tukkwi hpan amyu myu grai nga ai, Viruses kaw na byin ai hpe gaw nlu jep ai, Jigrawng kaw na byin ai Tukkwi hpe gaw lu jep shapraw ai lam, Du Kaba Labang Shing Rip tsun dan ai.
Laiza Muklum Mungshawa tsi rung hta Jigrawng kaw na Tukkwi ana byin ai marai 4 nga ai raitim marai 1 gaw mai tsai nna tsi rung yu sai lam chye lu ai.
Hkali, Tukkwi ana jep ai lam hpe August shata htum hkra sha masat da ai rai nna Hkali, Tukkwi sawng ai rai yang gaw September shata htum du hkra matut jep sa wa na re lam, Laiza Muklum kata hta Tukkwi ana makawp maga tsi hpe shata mi hta kalang gat ai, Jigrawng sat tsi hpe gaw shata 3 hta kalang gat ai re lam chye lu ai.
