Share shagan masat ninghtoi akyu hpyi hpawng galaw

Amyu hte Mungdan a matu asak ap nawng mat wa ai Mungtsaw Myutsaw share shagan ni hpe myit dum shagrau sha-a ai share shagan masat ninghtoi akyu hpyi hpawng lamang hpe August shata praw 10 ya jahpawt hkying 9:00am aten hta Laiza Muklum Padang Rung Gawknu kaw galaw ai lam chye lu ai.

Hpawng lamang hta Rev. Sai La Rip kaw nna Karai Kasang kaw akyu hpyi ap ya ai. Dai hpang Wunpawng Mungdan Amyu Sha Dawnghkawn hpe hkungga jaw ai, Wunpawng Mungdan hte Wunpawng Mungdan sha a ni matu asak ap nawng mat wa sai share shagan ni hpe hkungga jaw ai lam galaw ai.

Matut nna nawku hpung woi sara kaba ni kaw nna Wunpawng Amyu Sha ni a shut hpyit ai mara ni hpe Karai Kasang kaw hpyi nyem tawngban ai lam, Amyu hte Mungdan a matu asak ap nawng mat wa sai share shagan ni yawng, Hparadisu hta ngwipyaw ai hte ningngai nga lu na matu, share shagan ni ngam kau da ai Kanu Kawa dinghku nta masha ni a matu, Ginjaw Komiti Tinyang Up, Ginjaw Komiti Salang ni hkamja ngwipyaw na matu, Shanglawt Asuya Magam Gun kaji kaba yawng ngwipyaw hkamja sadi dung ai hte magam bungli hpe shakut shaja lu na matu, Wunpawng Amyu Sha ni a shawnglam Mungmasa ninggam tsaw rawt jat wa na hte Amyu Sha lawt lu lam hta myit hkrum kahkyin gumdin let shakut shaja sa wa lu na matu akyu hpyi ya ai.

Wunpwng Mungdang Shanglaw Hpung, Ginjaw Kimiti Tingnyang Up Du Daju Jum Nban La kaw nna Share Shagan Masat Ninghtoi mungga shaga ai. Share shagan masat ninghtoi mungga hta la kap bungjat nna Sara Kaba Kumhtat Hting Nan ( Ninggawn Amu Madu ) hku nna mung, chye ging chye mai ai lawnglam ni hte ya aten na KIO a mungmasa lam ni hpe tsun sang lang dan ai lam galaw ai re.

Share shagan masat ninghtoi akyuhpyi hpawng hta Ginjaw Komiti Salang ni, Mungchying Mungshawa Kanu Kawa ni, nawku Hpung woi Sara Kaba ni, Ramma ni hte Magam Dap, Makan Dap shagu na myitsu salang magam gun kaji kaba yawng marai 1600 jan sa du shanglawm ai lam chye lu ai.

Share shagan ninghtoi masat ai lam hpe lai wa sai 1975 ning August shata 10 ya shani hta Ginjaw Komiti Tingnyang Up, Kongsi Ningbaw Kaba Lahtaw Zau Seng gaw Mungdan magam bungli gunhpai nga ai ten, Thai Mungdan Htam Ngawp Kahtawng hta Tai hpyen gumlau ni a lata hta asak ap nawng mat wa sai. Dai shani hpe la nna share shagan masat ninghtoi hpe galaw sa wa ai re.

Ndai share shagan masat ninghtoi hpawng lamang hpe Mungdan kata Mungdan shinggan hte Wunpawng Amyu Sha ni nga ai shara shagu kaw galaw nga ai lam chye lu ai.