TNLA, MNDAA ni hte Myen Hpyen Dap ni shara 9 kaw gasat gala majan byin
Mungmyit Sinli Ga ( Kachin Sub-state ) KIA Dap Ba 4, Dap Ba 6, Dap Ba 10 ginra ni hta TNLA, MNDAA ni hte Myen Hpyen Dap ni August shata 17 ya shani lani mi hta sha, shara 9 kaw gasat gala majan byin ai lam na chye lu ai.
Gasat gala majan byin ai shara ni gaw, Sinli hte Lashio lapran na shagyit ( Gate ), Kuthkai lawu Galeng lam numshe makau Namba Chi, Nam Um lawu Ya Htaik ( ရထုိက္ ), Namhpaka lawu Yin Koi Tawng ( ရင္ခဲြေတာင္ ), Nam Gut mare tsi rung kawng, Bang Gai Ja Maw lam numshe, Hu Mung Yang Bang Kawng, Ya Za Kung hte Lashio shang wa ai makau na Asia World Gate shara ni hta re lam, shawng lam shi sawk ni kawn chye lu ai.
August 17 ya shani hta sha MNDAA hpyen hpung ni kawn mahkrai 3 hpe mung kapaw di kau ai. Nam Jarap makau na Mung Pawn mahkrai, Kun Lung lam 41 mile mahkrai hte Namti mahkrai ni re. Mahkrai 2 gaw naw mai lai ai rai nna, Namti mahkrai gaw nmai lai shi ai lam, buga masha ni tsun ai.
Dai ni August shata 18 ya hta gaw mani gap hkat ai shara rai nga ai Nam Gut hte Hu Nawng mayan kaw shani hkying 11:00am aten daram hta Myen Hpyen Nbungli Dap ni helicopter 2 hte 3 lang da bat gap nna Lashio maga bai nhtang yu mat wa sai lam, Namhpaka kaw Dap jung nga ai Myen Hpyen ni mung 120mm ngu maram lu ai laknak kaba hte 6 lang gap ai, nga nna shawng lam Salang langai shana wa ai kawn chye lu ai.
