Hku Mung mare kaw hpyen yen nga ai Nam Mwi mare na mungshawa ni malu masha ra ahkyak nga

Mungmyit Sinli Ga ( Kachin Sub-state ) ginra, Namhpakka ginwang hta Myen Hpyen Dap hte dingdung daw dap hpawm ni rai nga ai TNLA, AA hte MNDAA pawng hpawm hpyen hpung ni gasat gala majan byin ai majaw, Hku Mung mare kaw hpyen koi yen nga ai Nam Mwi mare na hpyen yen mungshawa ni malu masha ra ahkyak nga ai lam na chye lu ai.

Myen hpyen hpung hte dingdung daw dap hpawm ni gaw Nam Mwi mare kaw sha nga nna sinat jahkring hkring gap shangoi ai majaw mare masha ni hkrit tsang nga ai. Dai majaw mare masha ni gaw nnga gwi nna shanhte hpe sa woi la na matu, Dap Hpawm na lit nga ai salang ni hpe sa tsun nna August shata 20 ya shana hkying 6:30pm aten hta Namhpakka Sinpraw Buga na, hpung woi sara ni hte mare uphkang salang ni sa woi nhtawm Hku Mung mare hpung rung kaw shara jahkrat tawn ai lam, Sara Hkangda Ja Li Naw San tsun dan ai.

Hpyen yen ai nta htinggaw 20 jan re. Ndai ni a matu malu masha ra ahkyak taw nga ai. Ya gaw mare hpung kaw na mai byin ai daram jaw da ai. Majan matut nna naw byin wa yang gaw Nam Mwi mare makau na Chyai Len mare ni mung naw yen ra na masa nga ai, ya aten hta Chyai Len hte Hku Mung laika sharin Jawng ni gan pat da ra ai lam, Sara wa matut tsun dan ai.

August shata 17 ya shani kaw nna Myen hpyen dap hte dingdung daw dap hpawm TNLA, AA hte MNDAA hte pawng hpawm hpyen hpung ni shani shagu ngu na gasat gala majan byin nga ai majaw, Nawng Swi mare, Sik Phyu mare, Nam Gut mare hte Hku Nawng mare hkan na mungshawa marai 100 jan gaw ya aten hta Kuthkai mare na tinang a makyin jinghku ni a dum nta hkan gan shing byi nga ai lam na chye lu ai.

Photo cretdit: Ja Di Hkangda