Masat yan ( 14 ) Balik jawng yu hpawng galaw
Masat yan ( 14 ) Balik jawng yu hpawng hpe Laiza Muklum, Alen Bum, Ning Awn Gawknu kaw August shata 27 ya jahpawt hkying 8:00am aten kaw na shani hkying 10:00am aten du hkra galaw ai lam chye lu ai.
Jawng yu hpawng hta nawku hpung woi sara ni akyu hpyi ya nhtawm, myusha dawng hkawn hpe hkungga jaw ai. Dai hpang Salang kaba Maji Naw Mai hku nna Jawng yu shatsam mungga shaga ai.
Dai ni jawng yu ai jawngma yawng marai 36 kaw na Kasi kaja tai kumhpa hpe Shadang Lahpai Naw San hkam la lu ai. Laika ningtawn kumhpa No.(1) hpe Shadang Labang Brang Rip Awng lu ai, No.(2) hpe Shadang Nhkum Adim Tawng hte No.(3) hpe Shayi Zahkung Bawk Nan ni lu ma ai.
Balik jawng hta sharin ya ai sharin ginhpan ni gaw Rawt malan labau, Jinghpaw laika ka htung ka lai, Ninggawn Mung masa, Hpung Party lam, Mungchying uphkang dap a gaw da ai tara, Balik Dap a Lam Masan hte Rung hkri dun hkrang, Mara amu hte seng ai htung lai, Hkyuk htawng tara, Balik lashum,Tara rung hte Balik dap ta tut bungli hkri dun hkrang, Laksan hte magup sumhpa upadi, Sawk Tam, Rim, Zing hpaji, Ru hka hte seng ai upadi, shiga sawk sagawn hpaji, sakse hkam upadi, ginra gawn hkang hpaji, Wunpawng jau hkyen ( masha rim hpaji ), Balik dap hpung laksan Nanghpam Ka-ni pat shing dang ( jasan ) Rung lam masan, Modo/ Cycle gawn hkang hpaji, Balik hte seng ai laksan lakjet hte hpyen majan hte hpyen zai ladat lakjet, Kaichyan hte seng ai lakjet ni hpe sharin ya ai lam chye lu ai.
Yaw shada lam hpe Ginjaw Balik Dap, Ningtau matsun Du-1 Dukaba Lasaw Ngabat ya na zawn tsun ai. “Mung mare masha ni a tara upadi, mungshawa ni a akyu ara gun hpai makawp maga na matu hte mungmare masha ni a shing lum lam lu la hkra, kaji ni hpe kaba ni ndang sha na hku, gawng kya ai ni hpe kaba ai hku dip lu dip sha lam nnga na hku, ja gumhpraw lu ai ni, nlu ai ni hpe dang sha ai zawn re ni nnga na matu rap ra tara hpe yaw shatawng shada nna hpaw da ai Balik dap re”nga nna tsun ai.
Balik Dap hpe 2003 ning hta Alen Bum, Ginjaw Balik Dap kaw hpaw hpang ai rai nna Masat yan 1 kaw na Masat yan 14 du hkra rai yang jawng yu ai Balik magam gun yawng marai 500 jan re sai lam chye lu ai.
