Chyurum ai Wunpawng sha ni a ginru ginsa labau gawn sharin la ai hpawng galaw

Langai lang na Chyurum ai Wunpawng sha ni a ginru ginsa labau gawn sharin la ai hpawng hpe Hpakant Ginwang Chyurum Wunpawng Htunghking Hpung ni kaw nna woi awn nhtawm, Miwa Gumsan Mungdan, Sakhkung Mungdaw Mangshi Muklum De-An Hotel kaw August shata 27 ya shani kaw nna 30 ya shani du hkra 4 ya tup galaw nga ai lam chye lu ai.

Sharin sara ni gaw, Shanhpyi Laika Machyoi Du Kaba Manam Tawng  (Htoi Man), Sara Dingga Tang (Miwa Gumsan Mungdan), Sara Zinghang Gam Htun ( Singapore ) hte Yangon kaw na Sara Dashi Naw Seng Htun ni kaw nna sharin ya ai.

“Yaw shada lam gaw Wunpawng amyusha ni a ginru ginsa labau lam yan hpe hkum tsup ai hku chye lu na matu hte sawk ginlen sharin hkam la lu na matu re” nga nna Hpakant Ginwang Chyurum Wunpawng Htunghking Hpung malawm, sharin hpawng sa ai ni hpe woi awn ai Shadang Sumlut Naw Htoi tsun ai.

Sharin hpawng hta Hpakant Ginwang Chyurum Wunpawng Htunghking Hpung kaw na Htunghking ningbaw ningla ni marai 30 hte Mangshi Muklum na Salang ni hte Mangshi dakkasu kaw na Wunpawng jawngma ni yawng marai 50 daram sa du sharin hkamla ai lam chye lu ai.

Photo: Lamu Shen Naw