Masat yan ( 5 ) ningpawt ninghpang Myihprap wan wunkat ( Basic Level ) Yu akyu hpyi hpawng galaw
Wunpawng Mungdan Shanglawt Asuya Sut Masa Magam Dap Myihprap wan gawn hkang makan dap kaw nna lit la hpaw sharin ya ai Masat yan ( 5 ) ningpawt ninghpang myihprap wan wunkat ( Basic level ) yu akyu hpyi hpawng hpe Laiza Muklum, Ginjaw sut masa magam dap gawknu kaw August shata 31 ya jahpawt hkying 9:00am aten hta galaw ai lam chye lu ai.
Wunkat yu hpawng hta nawku hpung woi sara ni akyu hpyi ya nhtawm, SMD Lit Hkam Dukaba Shadan Yaw Ding kaw nna wunkat yu mungga shaga ai hta Sharin la sai wunkat yu jawngma ni yawng gaw lagawn laka nbyin ai sha gumhpraw njaw na sharin la ai hpaji re majaw jawng yu jang ngut sai, kam yang galaw na nkam yang n galaw na ngu ai hku nre sha gumhpraw n jaw na sharin la ai hpaji grau manu dan ai ngu hkap la nna tatut hkrang shpraw galaw sa wa ga, shata mi hta hpaji langai jat la yang laning mi hta hpaji 12 jat la sai re majaw n lagawn ai wa a matu, hka ja mayu ai wa a matu gaw galoi mung hpaji re nga nna jawng yu mungga hta tsun ai.
Wunpawng amyusha ni myihprap wan gawn hkang ai hpaji chye ai masha nlaw shi ai majaw myihprap wan chye sung lang ai masha grau law wa lu na matu, wan gawnhkang hpaji hte kan bau magam bungli galaw lu na matu hte magam gun masha nnan jat bang la lu na matu yaw shada let myihprap wan gawn hkang wunkat galaw ai re lam, Laiza Muklum, Myihprap wan gawn hkang makan dap Du, Dukaba Jum Gam Awng tsun ai.
Sharin ya ai sara gaw Sara Kaba Engineer Dr. Shadau Kum Li sharin ya ai, Madung sharin ya ai sharin ginhpan ni gaw Basic Electricity and Electronic, Safety System, Internal Wiring Design and Installation, Earthing System hte Basic Motor and Transformer ni hpe sharin ya ai lam chye lu ai.
Dai ni wunkat yu hpawng hta nintawn ai jawngma ni hpe No.1,2,3 hte shakut sharang ai jawngma ni hpe No.4,5 hku nna kumhpa shagrau ai lam galaw ai hta No.1 hpe shadang Labang Gam Awng, No.2 hpe shadang Lahpai Zau Ring, No.3 hpe shadang Nhkum Tsaw Awng, No.4 shadang Magawng Mung Dan Awng hte No.5 hpe Shadang Chyauhpa Naw Mai ni lu la ai re. Wunkat hta lak lai ai hku nna shang lawm ai shayi Labya Ji Mai hpe mung kumhpa shagrau ai lam chye lu ai.
Wunkat hpe August shata 20 ya shani kaw nna 30 ya shani du hkra nhtoi 10 ya tup myihprap wan hte seng ai hpe sha san san sharin ya ai rai nna, wunkat hta ngut hkre hkra sharin hkamla ai wunkat yu jawngma ni yawng marai 63 hpe masat masa lak mat shagrau ai lam chye lu ai.
Ginjaw Sut masa magam dap myihprap wan gawn hkang makan dap kaw nna myihprap wan wunkat hpe shaning shagu hpaw sharin nga ai rai nna du na shaning ni hta mung myihprap wan gawnhkang hpaji chye mayu ai, myit lawm ai ramma ni kadai raitim sa du sharin hkamla mai ai re lam chye lu ai.
